Það logaði ekki ljós..

...á perunni hjá löggjafanum þegar raforkumarkaðurinn var gefin frjáls. Nú er vart enginn fjárhagslegur akkur fyrir fólk að spara rafmagn þar sem rafmagnið sjálft er orðinn að hálfgerðu aukaatriði í rafmagnsreikningum. Það ku vera dreifingin sem er orðin dýr. Þó svo að fólk taki upp á því að elda mat sinn á hlóðum, lesa við kertaljós og þvo af sér á bretti í köldu vatni þá er það ákaflega takmarkað sem hægt er að klípa af rafmagnsreikningum.

Ég skora á ykkur að lesa yfir rafmangsreikninga ykkar og reyna að sjá hvað þið sparið margar krónur á því að nota spar-perur (sem kosta lungu og lifur), eða öllu heldur hversu langlífar þær þurfa að vera áður en sparnaður hlýst af.

Öllu jafna er ég hlyntur því að ríkið sé ekki að skipta sér af samkeppnisrekstri, en þarna gerðist nákvæmlega það sama og allsstaðar annarstaðar þegar hömlum var aflétt á þessum markaði og að mínu mati hefðum við verið betur sett en með þessum ólögum.

Það eina sem hægt væri að spara eru orkuver, þannig að meira verið afgangs af fallvötnum og háhitasvæðum fyrir stóriðju...

Sala á glóðarperum væntanlega bönnuð í Ontario

Frídagur! Hvað skal gera?

Jahérnahér! Það kom að því að maður tók sér dag í frí! Planið gekk út á það að plana ekki neitt og bara gera það sem manni langaði til akkúrat það augnablik. En það var ekki langt frá því að maður næði að missa af því þar sem mér tókst að sofa fram YFIR hádegi!!! Hef ekki gert það óþunnur í áraraðir...

Hvað um það ... drattast á lappir fullur skömm yfir því að hafa sofið svona lengi og kveikt á sjónvarpinu... ég rétt náði í síðustu 5 hringina á Formúlunni og náði þar að finna nýjann uppáhalds-dræver eftir að Kimi sveik lit og fór að aka um á Fiat (ferrari). Hamilton kom sá og sigraði í mínum huga enda er hann þegar orðinn sigursælasti nýliðinn í Formúlunni og gott er ekki öllu fjögurahjóla mótorsporti. Svo dagurinn var strax orðinn fínn.

Um það leiti þegar ég náði að klára að mylja stýrurnar úr hinu auganu, þá stakk konan upp á því að við myndum skreppa austur fyrir fjall í kaffi, en hin raunverulega ástæða fyrir hennar áhuga á austurferð var að sjá stöðuna á húsinu okkar.. ekki það.... við fengum kaffi hjá brósa. Eftir stutt stopp fyrir austan þá burruðum við beint í bæjin aftur og fórum í búðir... eitthvað sem við bæði hötum af lífi og sál... nema þegar kemur að því að endurnýja hluta af tölvuflota heimilisins sem er nú orðið býsna aðkallandi þar sem tölvan mín á 6 ára afmæli um þessar mundir, skjarinn jafn skýr og greinilegur og blautt frímerki, kæliviftan ámóta hávær og þrítugur Candy-ísskápur sem hefði getað fengið Gandhi sjálfann til að gleyma friðsamlegu leiðinni á augabragði... og vinnsluhraði sem minnir á Miklubraut við Lönguhlíð milli fjögur og fimm á föstudögum.... þegar 7 bíla aftanákeyrsluhalarófa (flott orð) er á annarri akgreininni og allir sem eiga leið hjá þurfa að tjónameta hvert eitt og einasta bílhræ. Þetta endaði allt með því að tölvurnar sem við völdum voru ekki til og ég er því að pkka þetta á gömlu maskinuna.

Svo var bara farið heim, slakað á.... étið... legið í leti og fyrr en varði þá var dagurinn bara búinn og kominn tími á að fara í bælið.... ræs 6:30 í fyrramálið.

Best að fara að sofa. Góða nótt!

Þá er það á hreinu...

...að páskaegg eru ekki lyf við blog-leti! Held að ég verði að sætta mig við það að sólarhringurinn er ekki nema aumir 24 tímar.

Það leiðir óneitanlega hugan að því hvernig í andsk.. þessir blessuðu þingmenn okkar og aðrir pólítíkusar (sem ættu að vera óhugnanlega uppteknir af því að fylla allar ermar af innantómum loforðum núna korteri fyrir kosningar), hafa tíma til að blogga?? Sjálfur vinn ég hefðbundinn 9 til 10 tíma vinnudag (sem þykir skidogingenting í mínum bransa), fer austur fyrir fjall strax eftir vinnu og streða við húsbyggingar (þá annað hvort í eigin eða hjá foreldrum mínum), drattast tilbaka yfir fjallið um miðnætti, sturta, bælið... svo er vaknað 6:30 á morgnana og hringurinn hefst aftur. Nema um helgar! Þá fer ég ekki í vinnuna!.... bara beint austur og held áfram að vinna í því að koma þaki yfir höfuðið á fjölskyldunni sem ég er farinn að vanrækja meira en góðu hófi gegnir. Þannig að það skal engan undra þó maður gefi skít í að blogga í viku eða tvær...

 

Eru páskaegg lyf gegn blog-leti?

Sælinú gott fólk!

Eins og þið hafið eflaust tekið eftir þá hef ég verið blog-latur með eindæmum upp á síðkastið. Svo ég reyni nú að finna mér einhverskonar kústskaft til að skýla mér bakvið... þá hefur verið mökkbrjálað að gera hjá mér á öllum vígstöðvum, nema hvað ég skal viðurkenna að 1. apríl þá tók ég mér letidag ásamt fjarstýringunni og zappaði villt og galið á milli Discovery rása, lá í leti og drakk Kaffi / Pepsi Max.

En þessi langþráða letistund mín var bónusvinningur þess að ég fór í fermingarveislu hálfbróður dóttur minnar... summ-c eldra barn barnsmóður minnar.... huh... flókið?? Nei þetta er nú orðið alvanalegt á Íslandi í dag er það ekki? Burtséð frá því, þá var gaman að sjá blessaðann drenginn ná þessum áfanga, enda hefur hann mannast vel og við honum blasir ekkert nema björt framtíð og tækifæri verðug þess að nýta sér hvert sem örlögin leiða hann.

Þá er það pælingin... ætli páskafrí (sem verður örugglega nýtt að hluta til að vinna myrkrana á milli) verði nýtt til þess að halda smá aksjóni á blogginu?

Sjáum til hvort súkkulaðiegg með nammi, plasthænsnum og málshætti virki á blog-letina.

Þar til næst... farið vel með ykkur.

Skelfilegt slys

Það er ekki laust við það að maður fyllist vanlíðan af því að lesa um þennan hörmulega atburð. Þessi slys eru svo skelfileg að engin orð fá því lýst og sýnir okkur öllum það að það er aldrei of varlega farið.

Ég votta aðstandendum hins látna mínar dýpstu samúðarkveðjur.

Banaslys á Reyðarfirði

Hversu stór þurfa glösin að vera??

Svona vill fólk þá hafa það!! Borga stórfé í félagsgjöld í kerlingaklúbbnum (ESB) og horfa upp á aurana renna í svona fávitaskap eins og að spyrja fólk hvort það detti í það eða ekki. Svo hefur það eflaust kostað skildinginn að finna þessa fimm-glasa skilgreiningu á hugtakinu fyllerí! Einhverjir blýantsnagarar (takk fyrir hugtakið Jón Baldvin) í Brüssel hafa eytt mánuðum saman í drykkju á áfengi úr misstórum glösum til að komast að þessu.

Hversu stór þurfa glösin að vera til að maður teljist fara á fyllerí????

Hvar ætli við íslendingar myndum lenda á svona lista?? Eflaust mjög neðarlega, því við drekkum svo helvíti mikið á stút!

Ekki er nú öll vitleysan eins.

Þriðji hver Íri fer á fyllirí

Verðum við alltaf jafn hissa?

Það var nú gott að blessuð konan "hlaut einungis beinbrot" og sjúkraflutningamaðurinn eymsli í síðu, því þarna hefði getað farið illa.

En núna þegar Maðurinn með Umferðar-Ljáinn er búinn að taka sinn fyrsta toll í ár (mínar dýpstu samúðarkveðjur til aðstandenda),  þá fyllist maður ákveðinni bölsýni og vantrú á okkur íslendinga sem ökumenn.

Ég á leið um Hellisheiði á hverjum degi og því blasir við mér skiltið ljóta með tölu fallina í umferðinni. En það blasir ýmislegt fleira við mannai; ökulag sem teldist hættulegt við akstur klessubíla í tívolí, Gáleysi sem fær Viggó Viðutan til að virka einbeittur og skýr, hraðakstur þar sem ætla mætti að viðkomandi væri að missa af eigin jarðaför... og þetta á sér stað í hvaða færi sem er!

Siðast núna í kvöld þá var einn jeppi runninn af veginum.... öfugu megin að sjálfsögðu... sem betur fer var enginn mætandi bíll, en þetta hefur verið hressilegt högg á bílinn. Einhver snillingur ók aðeins of hratt niður Skíðaskálabrekkuna og fór hana í sankölluðu stór-svígi, því BREMSANDI hjólförin láu þvers og kruss niður alla brekkuna og þá meina ég þvert á milli rekkverka niður alla helv... brekkuna. Svo sá maður hjólför hér og þar útaf veginum, rekkverkið á 1+2 kaflanum í Svínahrauninu búið að taka smá smell af einhverjum stjórnlausum bíl (hefur eflaust forðað því að viðkomandi varð að húddskrauti hjá mætandi vegfarenda.

Fyrirgefið að maður verði fúll, en hvernær ætlar fólk að læra að aka eftir aðstæðum. Það gæti haldið skiltinu ofan við Litlu-Kaffistofuna óbreyttu lengur.

Farið varlega í umferðinni.

Bílslys á Suðurlandsvegi

Lengi lifir í gömlum glæðum

Ég trúði vart mínum eigin augum þegar ég las þessa frétt (eftir að hafa lesið blogg um hana út um allt). Er karlinn endalega genginn í barndóm? kominn aftur í gamla Sovjet-fílinginn? Það er nokkuð ljóst að það lifir lengi í gömlum (rauðum) glæðum.

Hann meinar eflaust vel og vill eflaust ættleiða öll heimsins börn og allar þúfur og kletta sem þar finnast, en þarna er forsjárhyggjan komin á hættulegt stig... Toppar Leyni-Löggu drauma Björns Bjarna margfalt!

Það er ekki nóg að hljóta Rússneska kosningu á halelúja-samkomu og klapp að launum fyrir hver tíu töluð orð... kanski hin 80% af íslensku samfélagi kæri sig ekkert um Stóra bróðurs tilburðina sem á að fara að bjóða manni upp á.

Skammastu þín Steingrímur!

Sagan af litlu gulu hænunni...

Ekki það að maður leggi það í vana sinn að sparka í liggjandi mann, en mikið var þetta nú skemmtileg og "kaffiilmandi" spurning hjá nafna mínum Bergssyni. Hart nær hver einasti kjaftur kom á mengandi bíldruslu á landsfundinn.... er það ekki svipað og að mæta á herðablöðunum á AA-fund? ...ekki veit ég það.... enda hvorki vinstri-grænn né stútur.

Græn-kommar! Standið við stóru orðin og gerið eins og ný-endurkjörinn formaður ykkar: Labbið landshorna á milli!

...munið hvernig fór fyrir hinum dýrunum í sögunni af litlu gulu hænunni!

Einn á hjóli hjá VG

Hvað kallar maður pennaleti nú til dags?

Svona fyrir utan "grumpið" í færslunni hér á undan, þá hef ég varla nennt að pikka staf á bloggið í hart nær mánuð! Það hlýtur að flokkast undir ...pennaleti... ? eða hvað?

Þetta er nú samt ekki svona einfalt, því maður hlýtur að forgangsraða og greinilega er bloggið hjá mér svona aftarlega í goggunarröðinni. Þannig er nú það. Þið sem þekkið til vitið að ég er að byggja (blóm og kransar vinsamlega afþakkaðir) og það er tímafrekt samhliða fullri vinnu. Reyndar var ég skynsamur og tók frí úr vinnunni núna og er full-time að byggja. Samhliða þessu þá er konan á fullu í sínu námi og þetta setur eðlilega dálitla pressu á okkar litlu veröld. En ég veit að við förum létt í gegnum þetta.

Upp með hamarinn, bókina og..........sólina. Þetta hefst allt að lokum.